Dywedwch wrth eich ymgeiswyr: rydyn ni eisiau Cymru lanach, wyrddach a thecach

Mae etholiad y Senedd ar ddydd Iau 7 Mai 2026 yn drobwynt i Gymru.

Mae ein cymunedau’n wynebu heriau brys: afonydd llygredig, aer anniogel, tlodi tanwydd a hinsawdd mewn argyfwng. Bydd yr etholiad yma yn penderfynu pwy sy’n ein cynrychioli ni yn y senedd nesaf – ac mae cyfnod byr o amser gyda ni i ddweud wrth ymgeiswyr beth sy’n wirioneddol bwysig i bobl Cymru.

Mae angen arweinwyr beiddgar arnom ni a fydd yn cynnig bywyd a dyfodol gwell i bobl ac i natur. A fydd yn amddiffyn bywyd gwyllt, yn adfer ein hafonydd ac atal llygredd a gwastraff. A fydd yn darparu ynni glân a chartrefi cynnes, yn eiriol dros hawliau pobl a helpu cymunedau i addasu i’r heriau sy’n ein hwynebu.

Mae’r etholiad hwn yn bwysig, felly sicrhewch fod eich llais yn cael ei glywed. E-bostiwch eich ymgeiswyr heddiw a helpwch i sicrhau Cymru lanach, wyrddach a thecach i bawb.

• Yr hyn rydyn ni'n galw amdano:

  Mae Cyfeillion y Ddaear Cymru yn galw ar Senedd a llywodraeth nesaf Cymru i:

  • Chwarae ein rhan mewn ymdrechion byd-eang i leihau nwyon peryglus sy’n cynhesu ein byd. Mae hyn yn golygu ynni adnewyddadwy glân ac nid tanwydd ffosil, a ffyrdd mwy cynaliadwy o gynhesu ein cartrefi, o deithio ac o fyw ein bywydau.
  • Gwrthwynebu llygredd a dal llygrwyr yn atebol – gan fynd i’r afael â llygredd dŵr, tir, plastig ac aer i’n diogelu ni a byd natur, fel y gallwn ni oll fwynhau amgylchedd iach.
  • Byddwch yn deg a chydnabod fod brwydro yn erbyn anghyfiawnder - yn lleol ac yn fyd-eang - yn allweddol i ddatrys yr argyfwng hinsawdd. Bydd angen cymorth ar rai pobl i addasu i dywydd eithafol a thrawsnewid i swyddi gwyrddach, a rhaid grymuso cymunedau i lunio eu dyfodol eu hunain.